Síðan russisku innrásina í Ukraina hin 24. februar hevur russiski herurin oyðilagt fleiri enn 1800 størri og smærri lærustovnar í Ukraina.
Tað sigur ukrainski forsetin, Volodymyr Zelenskyj.
Í sínari dagligu video-talu segði hann, at neyva talið av oyðiløgdum stovnum kring um í landinum er 1.873.
- Avleiðingarnar eru ovurhonds stórar, legði hann aftrat, og tað er tiðindastovan CNN, sum ber hesi tíðindi.
Við í talinum, sum ukrainski forsetin vísir á, eru barnagarðar, skúlar, hægri lærustovnar og aðrir útbúgvingarstovnar, ið eru rakt av russiskum álopum.
Volodymyr Zelenskyj segði eisini í video-taluni, at Portugál hevur bjóðað sær at hjálpa til við at byggja upp aftur ukrainskar skúlar og barnagarðar.
Tað var á einari vitjan í Kyiv í dag, at forsætisráðharrin í Portugál, Antonio Costa, segði, at landið vil veita Ukraina hesa hjálp.
Tað upplýsir ukrainski forsetin eftir vitjanina í dag.
Sambært býráðnum í Tsjernihiv hevur býurin tilsamans 35 skúlar, men undirvísing er bert í sjey av teimum. Tað eru einans tríggir skúlar í býnum, sum higartil ikki eru raktir av russiskum rakettum.
##med2##
