– Tíðin hevur leingi verið búgvin til, at politiski myndugleikin tryggjar, at fleiri aktørar sleppa inn á el-veitingarmarknaðin, so nýhugsan kemur í hásæti, og el-prísir lækka
Tað sigur Jóhan í Niðristovu, stjóri í P/F Røkt í Vestmanna, sum eigur og rekur vindmyllur, sum framleiða streym til netið hjá SEV.
Í morgin verður aðalorðaskifti á tingi í sambandi við frágreiðing sambært § 51, stk. 4 í Tingskipanini um elorkuøkið. Í hesum sambandi hevur Røkt sent út sínar hugsanir um, hvussu kapping kann skapast á el-veitingarøkinum.
Røkt skrivar soleiðis:
»Samstundis, sum Løgtingið hevur aðalorðaskifti um el-veiting í Føroyum, er føroyski marknaðurin fyri el-veiting á einum vegamóti.
- Nú er tíð uppá at koma víðari. Eftir 8 ár við galdandi lóggávu er rætt at lata el-marknaðin veruliga upp. Fleiri aktørar mugu sleppa inn at kappast til gagns fyri føroyska brúkaran. Alternativið er, at Føroyar flyta seg aftur í gomlu monopolstøðuna, har ið menningin aftur dovnar.
Tað sigur stjórin í orkufelagnum Røkt, Jóhan í Niðristovu. Hann vísir landspolitikarum á, at hóast lóggávan formliga loyvir fleiri framleiðarum á el-marknaðin, er tað bert galdandi á pappírinum.
- Veruleikin er, at um føroyski brúkarin - vit øll - skulu fáa gleði av nýhugsan, øktum dynamikki og bíligari streymi, so má marknaðurin latast veruliga upp, sigur Jóhan í Niðristovu, stjóri.
Í frágreiðing, sum Røkt hevur latið løgtingslimum og júst nú almannakunngjørt, er ein røð av fyrimunum við fleiri aktørum, m.a.: størri innovatión; meiri framleiðsla úr varandi orkukeldum; lægri og sambæriligir brúkaraprísir; størri virksemi og størri virðisskapan í el-veitingarvinnuni.
Røkt hevur m.a. hesi tilmæli til framtíðar el-orkupolitikk Føroya:
· Endurskoða reglur um at lata framleiðsluloyvir fyri at fáa eina meira dynamiska vinnu
· Útbjóðingartreytir mugu stilla bjóðarar líka
· Lata upp fyri meiri brúkarastýring og prísdifferensiering
· Lættari at elektrifisera orkunýtslu
· Myndugleikavgerðir mugu takast nógv skjótari
· Landsstýrið eigur at taka sær størri ábyrgd av elveitingarmarknaðinum
· El-net og systemábyrgd eiga at leggjast í eina juridiska eind fyri seg
· Røkt eigur – eftir 10 ára bíðitíð – at sleppa til verka við síni pumpuskipan«
Frágreiðingin hjá Røtk kann heintast VIÐ AT TRÝSTA HER
