Klaksvík: Á býráðsfundi í Klaksvík í kvøld fer Klaksvíkar kommuna at geva Keypssamtøkuni byggiloyvi nýggjan handilsbygning.
Tekniska nevnd hjá býráðnum hevur mælt til, at Keypssamtøkan fær eitt øki norðanfyri Statoil-støðina í Nólsoyar Pálls Gøtu.
Á hesum staði hava klaksvíkingar bátar sínar standandi, og tí mugu hesir nú víkja fyri handilsbygninginum.
Keypssamtøkan hevur fyri mongum árum síðani søkt um byggiloyvi í miðbýnum í Klaksvík, men higartil er hetta ikki vorðið til nakað.
Ikki fyrrenn nú – á fundi í kvøld – sær umsíðir út til at hetta kann gerast veruleiki.
Fiskur ella handil
Í einum lesarabrævi í farnu viku vísti Kári Kjelnæs, fyrrverandi býráðspolitikkari í Klaksvík á, at tað líkist mestsum einum plástri á sárið at geva Keypssamtøkuni byggiloyvi á hesum staði og beint nú.
- Nú er so ætlanin at geva byggiloyvi á eitt sera centralt og í forvegin upptikið øki. Hetta økið er ein forlonging av verandi fiskaríhavn á Stongunum, skrivar Kári.
Her eru bátabrúgvar við møguleikar at seta bæði bátar og bilar frá sær. Og hetta er haraftrat eitt vakurt øki, sum ætlanin nú er at geva Keypssamtøkuni.
- Skal byggjast, má byggjast við skynsemi, sigur hann.
Skilaleyst
Millum tað vanliga fólkið í Klaksvík er somuleiðis stórur áhugi fyri hesum málinum – og kanska mest stórur ivi um, tað yvirhøvur er rætt at lata Keypssamtøkuna byggja júst á hesum staði.
Í eini viðmerking til tjakið í Norðlýsinum sigur ein klaksvíkingur, at tað er skilaleyst at byggja ein FK- handil við bátabrúgvarnar.
Fyri henda klaksvíkingin kemur avgerðina at fáa fleiri fylgjur:
Eingin hugni longur við bátabrúgvarnar
Ein stórur kolossur kemur at liggja tætt við bátarnir
Onki øki at seta bátarnar á
Eini seks húski fram við Nólsoyar Pálls Gøtu missa útsýnið út á vánna
- Tá Býráðshúsið sjálvt varð bygt, var á sama hátt bygt beint upp fyri vindeyga hjá øðrum. Ótrúligt, at man ikki kann læra av slíkum. Grannarnir eiga í hesum føri at kæra, sigur hesin klaksvíkingurin.
Gongst sum ætlað fer helst ein nýggjur FK-handil at liggja á hesum staði í framtíðini.
