Vit eru als ikki samd í niðurstøðuni hjá Fjølmiðlakommissiónini, sum hevur tikið eitt uppskot frá kringvarpsstjóranum um ein fjølmiðlagrunn til sín. Uppskotið gongur út uppá, at Kringvarpið heldur fram við at kappast við privatu miðlarnar um lýsingarnar, men at inntøkurnar fara í ein grunn, sum privatu miðlarnir og øll onnur kunnu søkja um stuðul úr til einstakar journalistiskar uppgávur. Kringvarpið fær helmingin at pengunum, meðan hin helvtin verður býtt út til miðlar og miðlafólk, sum kunnu gera ávísar uppgávur fyri privatu miðlarnar.
Boðskapurin hjá okkum til landsins myndugleikar er enn sum áður:
– Tryggið grundarlagið undir Kringvarpinum við kringvarpsgjaldi ella játtan á fíggjarlógini, og gevið privatu miðlunum frið at virka á vinnuliga frælsum grundarlag!
Tað er himmalrópandi órættvíst, at Kringvarpið – sum er ein skattainnkrevji – skal kappast við privatu miðlarnir, sum ongan almennan stuðul fáa, um lýsingarpengarnar!
Vit hava seinastu 10-15 árini havt mentamálaráðharrar úr Tjóðveldi, Fólkaflokkinum og Javnaðarflokkinum. Einki framstig er at hóma fyri privatu miðlarnar, tí hesir mentamálaráðharrar hava ikki havt rygg ella dirvi til at taka avgerð um, at ein almennur stovnur skal ikki liggja í kapping við privat vinnulív. Tað er hol í høvdið at ein skattafíggjaður stovnur sum Kringvarp Føroya miðvíst tægar støði undan privatum miðlum.
Kringvarpið skal vera óheft av øllum handilsligum áhugamálum. Tað er tað ikki, tá til dømis ein milliardafyritøka sum TF Holding í áravís sponsorerar veðurtíðindini í okkara skattafíggjaða public service kringvarpi.
Avgerðin er einføld hjá Bjørn Kalsø. Úr sínum liberalistiska sjónarhorni sær hann, at hann kann ikki tilláta sær at hava ábyrgdina av, at ein almennur stovnur kvalir privatar fyritøkur, sum høvdu klárað seg uttan almennan stuðul, sluppu tær at kappast á jøvnum grundarlag.
Úr sínum mentanarliga sjónarhorni sær hann eisini, at Kringvarpinum má tryggjast eitt trygt og gott grundarlag, sum avgjørt ikki skal vera handilsligt.
Vit bíða í spenningi, til Bjørn Kalsø vísir mansmót og loysir trupulleikan, sum 10 mentamálaráðharrar hava runnið undan síðani 1998.
