Hóast Christian í Grótinum varð afturhildin í Hetlandi í eini tvey samdøgur og teinurin heim til Føroya, tá skipið umsíðir kundi loysa aftur, var einar 18 tímar, er ikki líkt til, at hetta er gingið útyvir dygdina á feska makrelinum.
Jón Rasmussen, sum er partur av reiðarínum í Klaksvík, men sum er skipari á verksmiðjuskipinum Norðborg, sigur, at feski makrelurin, sum Christian í Grótinum legði upp til P/F Pelagos í Fuglafirði, var góður.
Christian í Grótinum hevði umleið 300 tons av feskum makreli, tá fiskivinnumyndugleikarnir í Skotlandi vildu hava skipið til lands, tí teir mettu, at alt ikki var, sum tað átti.
Jón sigur, at reiðaríið í Klaksvík hevur sett fyrispurning til okkara heimligu fiskivinnumyndugleikar viðvíkjandi framleiðslu umborð í ES-sjógvi.
- Vit vænta, at hesin spurningur verður sendur víðari til Brüxells.
Jón Rasmussen leggur aftrat, at føroysku fiskivinnumyndugleikarnir standa eins spyrjandi yvirfyri tulkingini hjá skotsku fiskivinnumyndugleikunum sum reiðaríið hjá Christiani í Grótinum og Norðborg ger.
