Tað eru bara nakrar fáar útvaldar matstovur í Japan, sum hava havt loyvi til at bjóða lívsvandamikla ballónfiskin, sum skrivarin av hesum greinastubba ikki kennir føroyska navnið á.
Á japanskum verður fiskurin róptur "fugu" - og á donskum ballónfiskur. Hetta er ein nógv eftirspurdur fiskur í Japan, men samstundis er hann fongdur við eituri, sum er lívsvandamikið og kann taka lívið av einum menniskja.
Krøvini fyri at kunna viðgera og borðreiða ballónfisk í Japan hava verið strong, men nú hava myndugleikarnir gjørt av at linka hesi krøv, so fleiri matstovur kunnu sleppa upp í part og bjóða fiskin út á síni matarskrá.
Verður ballónfiskur ikki viðgjørdur rætt, kann máltíðin við hesum fiski saktans gerast hin seinasta. Fært tú, sum gestur, eiturið av fiskinum í teg, kanst tú kvælast. Tað finst eingin heilivágur, sum hjálpir tær burtur úr andaneyðini.
Hvørt ár fara hendingar fram í Japan, har fólk gera sær máltíðir við ballónfiski - og sleppa ikki burtur úr hesum "eksperimenti" við lívinum.
Nakrar fáar matstovur í Japan hava havt loyvi at bjóða ballónfisk, men nú vilja myndugleikarnir so linka um krøvini - eisini í eini roynd at lækka prísin á hesi delikatessu.
- Aðrastaðni enn í Tokyo eru reglurnar linari og kortini henda neyvan nakrar eitur-vanlukkur, sigur Hironobu Kondo, sum umboðar matvørumyndugleikarnar í Tokyo, við tíðindastovuna, Reuters.
Men kokkurin, Naohito Hashimoto, sum hevur viðgjørt og bjóðað ballónfisk í 30 ár, er ikki fegin um avgerðina hjá myndugleikunum.
- Vit hava brúkt nógva tíð og nógvan pening upp á at sleppa at servera ballónfisk, men við nýggju reglunum kann ein og hvør bjóða fiskin uttan loyvi. Eg ynski ikki, at fólk skulu gloyma, at tey kunnu doyggja av at eta ballónfisk, sigur japanski kokkurin við Reuters.
