Fiskiskapurin eftir botnfiski undir Føroyum hevur verið støðugt versnandi seinastu árini.
Og ein nýggj uppgerð hjá Hagstovuni, staðfestir, at nú er fiskiskapurin tann vánaligasti hesi seinastu 20 árini.
Í miðal vórðu góð 125.000 tons av botnfiski fiskað undir Føroyum, árini frá 2000 til 2007.
Síðan 2007 hevur veiðan av feskfiski í miðal verið niðan fyri 100.000 tons.
Men í fjør vórðu bara 71.000 tons avreidd, og er tað so lítið, at leitast skal aftur til kreppuárini fyrst í 1990´unum fyri at finna líknandi tøl.
Í hesum sambandi verður hugsað um fiskiskapin undir Føroyum eftir fiski, sum er farin um avreiðingarskipanina, og uppsjóvarfiskur er ikki við í yvirlitinum.
Hagstovan sigur, at samanborin við undanfarin ár, var fiskiskapurin eftir upsa, toski og hýsu, væl minni í fjør.
Av upsa vórðu góð 8.000 tons avreidd í fjør og tað er ein fjórðingur minnni enn í 2012.
Fiskiskapurin eftir toski og hýsu hevur verið vánaligur seinastu nógvu árini, men upsafiskiskapurin hevur verið betri.
- Men seinastu trý árini hevur nøgdin av upsa eisini verið nógv fallandi, heilt niður í 25.000 tons í fjør, sum bara er helvtin av tí, sum í miðal var avreitt árini 2001-2010.
- Av toski varð avreitt áleið tað sama í 2013 sum í 2012. Havast skal í huga, at toskurin, sum varð fiskaður á Flemish Cap, er við í tølunum.
Kvotan á Flemish Cap var 3.100 tons í fjør, men áður er hon ikki komin gjøgnum avreiðingarskipanina.
Nøgdin av toski hevur verið støðugt lág seinastu sjey árini, í miðal um 10.000 tons um árið.
- Tey gott 9.000 tonsini, sum vórðu avreidd í fjør, er lítið samanborið við árini beint fyri aldarskiftið, og nakað inn í nýggju øldina, tí tá varð tvær ferðir og tríggjar ferðir meiri av toski avreiddur, enn nøgdirnar, vit hava sæð seinastu árini.
- Í fjør vaks nøgdin av hýsu 20 prosent afturímóti í 2012, men enn er fiskiskapurin vánaligur.
- Í fjør vórðu bara góð 3.000 tons av hýsu avreidd, samanborið við eini 20.000 tons í miðal árini 2001-2007.
- Nú minni er til av toski og hýsu, eru tað onnur botnfiskasløg, sum hava fingið størri týdning.
Nøgdirnar av longu og brosmu eru støðugt vaksnar síðan beint eftir aldarskiftið – úr góðum 2.000 tonsum upp í 4-5.000 tons.
Tó var í fjør eitt stórt fall í avreiddu nøgdini av brosmu heilt niður á botnstøðið fyri tíggju árum síðani, sigur Hagstovan.
|
