Um eitt ár hava vit fingið tann nógv umrødda fiskidagabankan.
Tað hevur Tórbjørn Jacobsen, landsstýrismaður í fiskivinnumálum, sett sær sum mál.
Hann sigur, at í løtuni situr ein nevnd og kannar, hvussu veiðitrýstið er í dag afturímóti tá ið fiskidagaskipanin varð sett í gildi.
- Endamálið við fiskidagaskipanini var, at hon skuldi vera sjálvregulerandi men nú skal so arbeiðið hjá hesi nevndini vísa, um tað veruliga er so, ella um veiðitrýstið í veruleikanum er økt.
Og tá ið fíggjarlógin fyri í ár er samtykt, fer hann at seta eina nevnd at gera tilmæli um broytingar í fiskidagaskipanina.
Ein partur av arbeiðnum hjá teirri nevndini verður at gera eitt ítøkiligt lógaruppskot um, hvussu ein fiskidagamarknaður kann gerast ein partur í lógini um vinnuligan fiskiskap.
Og hansara mál er, at lógin skal verða sett í gildið næsta summar.
Men hann leggur dent á, at ætlanin er at byrja í smáum.
Í fyrstu atløgu er ætlanin bara at leggja øll tey veiðirættindini, sum ikki eru fevnd av lógini um vinnuligan fiskiskap, inn í fiskidagabankan.
Hetta eru tey rættindi, sum føroyinga eiga í fremmandum sjógvi.
Hinvegin ásannar hann, at fiskiloyvini kunnu ikki vera drigin inn fyrrenn í 2018 og fyrrenn tá ber ikki til at fáa fiskidagabankan at virka álvara.
- Vit fáa ikki ein effektivan fiskidagabanka, fyrrenn loyvini verða drigin inn í 2018 og tað er endamálið, hóast vit byrja í smáum næsta ár, sigur landsstýrismaðurin.
Annars hevur verið skotið upp at byrja longu í ár við at taka 1% - 2% av fiskidøgunum longu í næsta fiskiári, sum byrjar 1. september, og leggja teir inn í ein fiskidagabanka fyri at føla seg fram og vita, hvussu bankin virkar.
Men tað verður av ongum, sigur landsstýrismaðurin.
- Fiskidagabankin skal byggja á klettafast grundarlag,tí tað er avgerandi neyðugt, at vinnan altíð hevur tryggar karmar at virka undir og sostatt altíð veit, hvat hon hevur at halda seg til.
- Tí fara vit undir ongum umstøðum at seta nakað í verk í óðum verkum og sostatt fara vit heldur ikki at gera okkum inn á ta skipan, vit hava, leggur hann afturat.
