Proforma-sølur
Fiskapakkin hjá landsstýrinum hevur ikki megnað at steðga proforma-sølunum.
Tað staðfestir Jens Kristian Olsen, stjóri í Fiskamarknaði Føroya.
Men hann sigur at fyribils í hvussu so er, fara tær ikki fram í líka stóran mun sum frammanundan.
Sjálvur vil stjórin í Fiskamarknaðinum treyðugt brúka orðið proforma-sølur.
Men hann sigur, at higartil hava teir bara staðfest at útróðrarfiskur verður sendur á marknaðin sum tað ber til at siga ikki er til sølu kortini, men teir hava ikki staðfest, at skipini gera tað.
Endamálið við hesum slagi av sølu er í veruleikanum at fáa eina váttan fyri at fiskurin kann flytast óvirkaður av landinum.
Kunsturin er sostatt at bjóða fiskin út á ein hátt soleiðis at ongin kann fáa fatur á honum, uttan tann ávísi keyparin.
Tað verður gjørt við at áseta óveruligar minstaprísir á fiskin, men tað kann eisini gerast við at áseta so ólagaligar leveringstíðir, at ongin kann keypa fiskin.
Vit kunnu staðfesta, at hetta slagi av sølum fer fram enn, men tað er ikki í líka stórum stíli sum fyrr við tað, at vit higartil bert hava staðfest, at útróðrarfiskur verður seldur á hendan hátt, samstundis sum vit ikki hava staðfest, at skipini gera tað.
Men Jens Kristian Olsen sigur, at tað skapar rættiliga stóra ónøgd á marknaðinum,
Tað er rættiliga forstýrandi fyri marknaðin, at fiskur er til sølu, sum í veruleikanum ikki er til sølu kortini, sigur hann.
