Finnur Justinussen hevur ikki máltevið av tilvild. Pápin, Símun Petur Justinussen gjørdist toppskjútti í bestu mansdeildini fýra ferðir, og nú skal nógv til, um ikki Finnur Justinussen vinnur sítt næsta heiti sum toppskjútti í vodafonedeildini, og tá er ungi málrevurin bert 22 ára gamal, og eigur hann nógv mál, og nógv skot í sær. Ungi gøtumaðurin hevur longu skotið 20 mál í bestu hetta kappingarárið. Av grundum, sum vit ikki kenna, so hevur hetta enn ikki vigað so tungt í landsliðsúttøkuni hjá Brian Kerr.
Mál beinavegin
Tað var ikki meir enn ein minuttur farin av dystinum millum Víking og ÍF, so hevði Finnur funnið málmeskarnar. Finnur kundi fingið sítt hattrick longu í fyrra hálvleiki, men tað var ikki fyrr enn aftaná steðgin, at hann aftur fekk gongd í málskjótingina. Triðja málið var ein sonn perla, har tann ungi málrevurin tamdi bóltin, og meddaði bóltin upp í samankomingina. Tey, ið ganga trúliga til fótbólt í Sarpugerði siga, at talan er um eitt av teimum bestu málunum, ið eru skotin í Sarpugerði í ár. Smáar 10 minuttir undan leikloki legði Finnur upp til fjórða málið, sum Kaj Leo í Bartalsstovu bleiv noteraður fyri.
Fult ímóti ÍF
Víkingar fingu fult ímóti ÍF í ár. Talan gjørdist um 1-0 og 4-0 sigrar á heimavølli í Sarpugerði, og ein 2-1 sigur í Fløtugerði í Fuglafirði. Orsøkin til, at Víkingar ikki endaðu ovari skulu heldur finnast í úrtøkuni hjá liðnum ímóti B36 og EB/Streymi. Víkingur fekk bert eitt stig ímóti B36, og fýra stig ímóti EB/Streymi. Tó er talan um framburð, um vit meta við 2010, tá fekk Víkingur einki heiðursmerki, og slapp ikki út í Europa. Nú hava teir bronsu, og Europa Cup luttøku, og Finnur kann vinna gylta skógvin. ÍF hevur í stóran manglað ein málskjútta í ár, og tí kunnu teir ikki fegnast á sama hátt, sum í fjør.
