FLOGBÓLTUR
Mjølnir var púra fyri ongum, tá liðið fyri viku síðani vitjaði í Sørvági, men nú enn ein útidystur var á skránni leygardagin, sá betri út. Tað eydnaðist at vinna á TB í Trongisvági, men sigurin varð ikki fingin til høldar uttan svørðsslag.
Í fyrsta setti sat Mjølnir á øllum, men longu í øðrum setti vendi TB dystinum og helt fram í triðja setti. Tá var Mjølnir á odda 24-16 og manglaði bara settbóltin, áðrenn TB raknaði við og enntá tók settið við 26-24!
At TB hevur fingið Gudrid Nolsøe aftur, er stórur styrkur, og hon lyftir eisini hinar upp við sær. Tað var eisini um reppið, at tað í fjórða setti bar heilt á mál, men best sum TB var komið í gongd, byrjaði spælið hjá Mjølnir eisini at batna í stórum, og tað eydnaðist at vinna settið og yvirliva.
Í fimta og avgerandi settinum var heldur ikki stórur munur á, men Mjølnir royndist drúgvari og fór avstað við sigrinum í einum væl spældum dysti, har serliga servurnar hjá báðum pørtum gjørdu, at liðið hinu megin netið ikki kundi loyva sær at taka sær av løttum.
