Mánakvøldið var undirhaldandi, intens og spennandi oyggjauppgerð við Løkin í Runavík, har ÍF vann 2-1 á NSÍ. Hetta var annar sigurin á rað hjá fuglfirðingum, sum harvið rættuliga hava meldað seg upp í aftur kappingina um at sleppa undan niðurflyting.
NSÍ legði seg á odda beinanvegin við framúr máli, sum Mamuka skoraði úr 22 metra fjarstøðu. Burtursæð frá fyrstu løtuni, tá ið NSÍ var greitt omaná, so var ÍF væl upplagt, og sum 2. hálvleikur leið var luturin hjá heimaliðnum at verja og dúva upp á snarálop.
Tá ið tað restaðu tjúgu minuttir skoraði ÍF tvey mál, og so sást tað heil væl, at fuglfirðingar stríddust fyri lívinum, og at NSÍ ikki hevur so nógv at spæla fyri.
Alt árið hevur ÍF havt trupulleikar at skjóta mál, og millum orsøkirnar til tað hevur aftur og aftur verið víst á, at tað er komið sera illa við, at Chris Muomaife hevur verið so skaðaplágaður. Hann varð keyptur til at skjóta mál, og tá ið hann hevur verið skaddur, so hevur tað víst seg at vera risa trupulleiki fyri ÍF.
Mánakvøldið var Chris Muomaife í ÍF álopinum. Tað sást væl, at hann er ikki í dystarvenjing, men samstundis var tað sjón fyri søgn, at hann hevur dygdirnar, sum ÍF so ofta fyrr í ár hevur restað: hann er sterkur, bóltførleikin er góður, máltevið er gott, og hann hevur gott skot.
Fyrra málið skoraði Chris eftir uppspæl í vinstru og innlegg. Bólturin brast í tvørtræið, niður í svøðrin og út aftur í spæl. Væl staddi linjuverjin markeraði, at bólturin hevði verið innanfyri, og dómarin, sum stóð seg sera væl, peikaði á miðjuna.
Lítla løtu seinni rann Chris frá NSÍ liðnum, sum hevði verið í álopi, og tá ið hann kom ímóti Andras Gango, lyfti hann bóltin upp um hann og í málið.
Bæði á og kring vøllin setti leiðslumálið rættuliga eld í fuglfirðingarnar, og ÍF avrikið bar boð um, at fuglfirðingar eru førir fyri bæði at spæla og stríða seg til rættin at halda fram í bestu deildini.
Fimm finalur
B71 er ivaleyst fokið, og nú er spurningurin, um tað verður 07 Vestur, KÍ, ÍF, HB ella B68, sum skal tungu leiðina niður í næstbestu deildina saman við sandoyingum. Tað eru bara tvey stig frá B68 á fimta plássi og niður til 07 Vestur á 9. plássi. Tí ber tað væl til, at alt verður vent á høvdið eftir einum degi.
Tá ið tað er so tætt, kann tað fara at vísa seg, at málmunurin fer at hava avgerandi týdning. Í tí kappingini er 07 Vestur ringast stillað, meðan B68 og HB eru betri fyri enn ÍF og KÍ.
Sunnudagin vísti HB, at tað ber til at fáa stig frá teimum, sum kappast um FM og heiðursmerkini, og ÍF sigurin mánakvøldið ber boð um, at NSÍ er til at tosa við.
Men tað verður fyrst og fremst í innanhýsis uppgerðunum millum hesi fimm – B68, HB, ÍF, KÍ og 07 Vestur – at tað verður avgjørt, hvør fer at sleppa undan niðurflytingini, og hvør fer at sita eftir við svarta peri. Higartil hevur kanska verið roknað við, at stigini ímóti sandoyingum fóru at verða lætt vunnin. Í Sørvági vísti B71 sunnudagin, at sandoyingar ikki eru farnir í vetrarfrí. So leingi tað er lív, er tað vón, plagar at verða tikið til, og tað hava teir í B71 tikið til sín.
Í toppinum royna Víkingur og EB/Streymur at geva B36 kapping um FM heitið, og í botninum verður talan um fimm finaluumfør við níggju dystum. Tveir teir fyrstu eru á skránni longu sunnudagin, tá ið HB skal til Fuglafirðar, og tá ið B68 skal til Sands.
Gongdin higartil hevur ikki givið nakra avgjørda ábending um, at nakað av hesum fimm liðunum er favorittur at sleppa undan niðurflytingini. Tískil er tað framvegis møguleiki fyri, at HB og KÍ sunnudagin 16. oktober í næstsíðsta umfari í Gundadali fara at stríðast um at sleppa undan niðurflyting.
Tað var ikki gamalt í føroyskum fótbólti, at dystirnir fram ímóti kappingarenda millum hesi bæði sigursvandu feløgini skuldi hava hesa dagsskránna, men tað er so nógv, sum er øðrvísi í føroyskum fótbólti nú, enn tað áður var. Bæði í toppinum og í botninum og tí bíða fimm finalur fyri framman!
- - -
Innanhýsis uppgerðir millum botnliðini:
23. umfar
ÍF - HB
B71 - B68
24. umfar
KÍ - B68
HB - 07 Vestur
25. umfar
B68 - ÍF
B71 - KÍ
26. umfar
HB - KÍ
07 Vestur - B68
27. umfar
ÍF - 07 Vestur
