Mikudagin hin 31. august vóru liðin fimm ár síðan Palli á Dul og bátsfelagi og vinmaður hansara, Leo Clothier, vórðu ásigldir í Skopunarfirði í bátinum, Mars, sum var glastrevjabátur av slagnum, Starlet 26.
Leo Clothier fórst í vanlukkuni, meðan Palli á Dul varð bjargaður. Kvøldið fyri túrin stóðu teir báðir so hugagóðir í útnyrðingskrókinum í bátahylinum undir neystunum á Argjum og egndu nakrar línur.
Hendingin fór fram á myrkari nátt í Skopunarfirði, og Palli á Dul hevur havt á munni, at tað tóktist serliga myrkt hesa náttina, tá farmaskipið – Mykines – sigldi á lítla glastrevjabátin.
Mars koppaði í harða stoytinum, men fleyt í sjónum við botninum uppeftir.
Báturin fleyt á luftini, sum var í stýrhúsinum og rúmunum í skrokkinum.
Eftir ógvusliga stoytin, fekk Palli á Dul tikið seg út úr stýrhúsinum. Hann noyddist at taka tøk upp úr sjónum fyri at koma upp í vatnskorpuna aftur.
Palli á Dul ásannar, at tíðin tykist long, tá slíkt hendir, men hann heldur, at hann lá einar 30-40 minuttir í sjónum og helt sær í bátin, áðrenn bjargingin kom.
- Tað tóktist so bølamyrkt hesa náttina. Eingin máni sást og eingin stjørna, og eg lá púra einsamallur á opnum havi. Báturin var koppaður, men eg hevði fingið í eitt lensihol í skrokkinum, og her royndi eg at halda mær fast.
Í samrøðu hevur Palli á Dul greitt frá sínari ógvusligu uppliving hesa náttina í Skopunarfirði. Men, hugsaði maðurin, at bjargingin var nær – ella gjørdist hann vónleysur í teirri støðu, hann var í?
- Lat meg siga tað beint út. Eg visti, at her vóru bara tveir møguleikar. Antin fert tú heim í himmalin til tey, sum fóru undan tær – ella fert tú heim aftur til familjuna.
##med2##
Palli á Dul hevur greitt frá, at hesir tankar gjørdu hann púrasta róligan, og hann var avkláraður.
- Eg kundi liva við at vera bjargaður og sleppa heim aftur til familjuna, men eg var eisini til reiðar at doyggja og sleppa heim í himmalin.
Sjálvur hevur hann sagt, at tað, sum bjargaði honum, var, at hann var avkláraður og ongantíð fór í ræðslu.
Nú fimm ár eru liðin síðan feigdarnáttina, hava vit fingið tvær myndir sendandi av vinmonnunum báðum, Palla á Dul og Leo Clothier, sála.
Hesar myndir eru tiknar um somu leið og um somu tíð fyri 11 árum síðan, har Mars gekk burtur – fyri nú fimm árum síðan. Palli á Dul sá ongantíð kæra bátsfelaga og vinmann sín aftur.
