Tað eru ivaleyst mong sum minnast at Fiat-bilar í 70- og 80-unum koyrdu við merkjum við áskriftini Jeg er Fiat-fan, hva´ fan er du.. Hetta var í eini tíð, tá Fiat var eitt av mest seldu bilmerkjum í Føroyum.
Hóskvøldið vitjaðu donsku Fiat-fjeppararnir frá Fiat Mini Klub Sjælland hjá Føroya Ellisakførum. Í hesum sambandi fekk felagið eitt slíkt Fiat-fan skelti sum gávu frá Fiat Mini Klub Sjælland . Tey vitjaðu í felagshølunum vviri við Strond og í gamla vatnbrunninum við Gráastein, har nógv ellisakfør standa.
Ferðalagið upp á 14 fólk, hava ferðaðst kring landið við teimum sjey gomlu Fiat-bilunum. Tey vitjaðu í Suðuroy, Sandoy, Eysturoy, Norðoyggjum og í Vágum.
Tey eru sera væl nøgd við túrin í Føroyum. Smáu Fiat-bilarnir vaktu stóran ans, allastaðni har tey komu, og tey komu í samband við nógv fólk.
Bilarnir fóru av landinum við Norrønu fríggjamorgunin og tey flestu í ferðalagnum fara við flogfari leygardagin.
