Fyri løtu síðani var dysturin millum FH og KR á Kaplakrika leikvøllinum á Hafnarfjørðinum liðugur. Dysturin sá leingi út at enda við javnleiki 0-0. Kennie Chopart hjá KR gjørdist dagsins hetja hjá útiliðnum, tá hann í tíðini, sum dómarin hevði lagt aftrat skoraði sigursmálið til 1-0.
Gunnar Nielsen vardi málið hjá FH, og hann hevði eina framúr góða bjarging, tá danski framherjin hjá KR, Jeppe Hansen hevði eina góða roynd á málið hjá FH í 69. minutti. Tað var tó ikki nógv Gunnar Nielsen kundi gera, tá Kennie Chopart skoraði sigursmálið fyri KR.
Kaj Leo í Bartalsstovu kom á vøllin fyri Jérémy Serwy tá 70 minuttir vóru farnir av dystinum. Hetta er fyrsti heimadysturin hjá Kaj Leo í Bartalsstovu fyri FH í íslendsku pepsideildini.
Komandi mánakvøld leikar FH oddadyst ímóti Fjølnir á útivølli. FH er enn oddalið, ikki minst tí Stjarnan spældi javnleik 1-1 ímóti Þrótti í kvøld. Hevði Stjarnan vunnið tann dystin, so hevði Stjarnan verið oddalið nú.
Støðan í pepsideildini aftaná 14 av 22 umførum eru avgreidd er sera spennandi :
| 1 | FH | 14 | 8 | 4 | 2 | 20:9 | 28 |
| 2 | Stjarnan | 14 | 8 | 3 | 3 | 27:17 | 27 |
| 3 | Fjölnir | 14 | 8 | 2 | 4 | 30:16 | 26 |
| 4 | Breiðablik | 14 | 7 | 2 | 5 | 17:12 | 23 |
| 5 | Víkingur Reykjavík | 14 | 6 | 3 | 5 | 20:16 | 21 |
| 6 | Valur | 14 | 5 | 4 | 5 | 23:18 | 19 |
| 7 | KR | 14 | 5 | 4 | 5 | 15:14 | 19 |
| 8 | ÍA | 14 | 6 | 1 | 7 | 17:25 | 19 |
| 9 | Víkingur Ólafsvík | 14 | 5 | 3 | 6 | 17:22 | 18 |
| 10 | ÍBV | 14 | 5 | 2 | 7 | 13:16 | 17 |
| 11 | Fylkir | 14 | 2 | 4 | 8 | 14:24 | 10 |
| 12 | Þróttur Reykjavík | 14 | 2 | 2 | 10 | 11:35 | 8 |
