Eitt ferðsluóhapp var á Gørðum í Klaksvík fyrrapartin.
Ein bilur er komin koyrandi suðureftir Skáltavegnum og hevur síðani snarað inn á Garðavegin. Av eini hvørjari orsøk, er bilurin tó farin av vegnum og hevur rent á ein garð uttan fyri eini sethús. Garðurin hevur fingið stóran skaða og tvir betongstabbar eru kvettir av.
Bilurin endaði á liðini í einum vallaðum øki, ið hellir oman móti Stangavegnum.
Sambært vakthavandi á løgreglustøðini er eingin mannskaði hendur í óhappinum.
