Tað verður eingin mánarakett skotin upp av Cape Canaveral í Florida í dag, soleiðis sum ætlanin hjá NASA annars var.
NASA hevur avlýst uppskjótingina, eftir at ein av tangunum við brennievni hevur fingið skaða, møguliga av snarljósi og toruveðri í gjár.
Síðstu nátt skuldi mánarakettin fyllast við brennievni, men tá varð staðfest, at ein riva var í einum av tangunum.
Útlendskir miðlar vita í dag at siga, at ógvuslig snarljós og toruveður var yvir Cape Canaveral í gjár.
Enn er tó ikki endaliga staðfest, hvør orsøkin er til, at ein riva kom í ein av tangunum við brennievni.
Sambært ætlanini hjá NASA skuldi mánarakettin skjótast upp í dag, men hetta er fyribils útsett.
Eftir ætlan skal ómannaða rúmdarfarið í seks vikur ferðast kring Mánan og heimaftur.
Hetta er fyrsta royndin undir navninum, Artemis, sum sambært NASA er eitt framhald av Apollo-verkætlanunum.
Útlendskir miðlar vita at siga, at NASA ætlar at senda fólk aftur upp á Mánan, og næsta stigið verður at senda fólk upp á Mars.
