Løgreglutíðindi
Trý ferðsluóhapp við størri materiellum skaða komu í døgnrapportina hjá løgregluni í Havn um vikuskiftið. Men sum heild var annars friðaligt.
Sjey feðsluóhapp vorðu fráboðað. Trý teirra við stórum materiellum skaða.
Seinnapartin fríggjadagin var ein bilur ákoyrdur aftan í frá við Statoil støðina í Kollfjarðardali. Hann stóð aftan fyri ein annan bil og bíðaði eftir at sleppa inn á støðina, tá ein triðji bilur koyrdi upp í reyvina á honum og rendi hann víðari fram í tann fremra bíðandi bilin.
Allir tríggir bilarnir fingu skaða, og ein persónur varð koyrdur á skaðastovuna. Tó við smærri løstum, sum ikki høvdu nógv upp á seg.
Seinni um kvøldið var aftur eitt líknandi óhapp uttan fyri Gamla Kirkjugarð í Havn.
Ein bilur, sum kom heim gjøgnum Jóannes Patursonargøtu, stóð og bíðaði eftir at sleppa niðan eftir Dalavegnum, tá ein annar bilur, sum eisini kom heimeftir, rendi upp í reyvina á honum. Samstundis var ein motorsúkkla á veg úteftir, og tann aftari bilurin, rendi so eisini á hana. Eingin persónsskaði hendi í tí óhappinum, sigur vakthavandi á politistøðini í Havn.
Leygardagin var eitt ferðsluóhapp beint niðan fyri kirkjuna við Sjógv í Kollafirði.
Ein bilur, sum kom koyrandi inneftir, endaði yviri í skeivari vegsíðu og rendi saman við ein bil, sum kom úteftir.
Stórur materiellur skaði var, og báðir bilførararnir fóru á skaðastovuna til kanningar, sigur løgreglan.
