Marner Tausen, suðuroyingur
Fyri stuttum var politikari úr útjaðaranum frammi við kravi um, at tað skal verða bíligari at ferðast millum miðstaðarøkið og útjaðaran.
Politikarin var heldur ikki hesaferð úr Suðuroynni hann var úr Klaksvík, og hann kravdi gjøgnum útvarpið, at tað skal verða helvtina bíligari at ferðast gjøgnum Norðoyatunnilin. Hann hevði eisini eitt ítøkiligt boð uppá, hvussu hetta skal fíggjast. Avdráttartíðin fyri lánini skal leingjast, og skattgjaldarin skal gjalda restina.
Sum flestu onnur, ið mugu gjalda fyri at koma inn í miðstaðarøkið, eri eg samdur við honum i, at bøtast má munandi um umstøður okkara, at ferðast millum miðøkið og útjaðaran. Øll væl lærd skilafólk hava í áravís sagt okkum, at tú kanst ikki menna útjaðaran, um tú ikki hevur gott samband við meginøkið.
Landið eigur Norðoyatunnilin, Vágatunnilin (partafeløgini) og Smyril. Tá fólk, sum ferðast úr miðøkinum norðureftir og vestureftir, kunnu keypa kubbar fyri hálvan prís, ja, so eiga fólk, sum ferðast suðureftir, sjálvandi eisini at kunna keypa somu kubbar fyri sama prís.
Føroyingar hava higartil staðið saman og víst samhaldsfesti á flestum samfelagsøkjum eisini tá talan hevur verið um at menna miðstaðarøkið. Samfelagsfrøðingur hevur nýliga víst á, hvat útjaðarin hevur mist í kappingarføri, fyri at miðøkið kundi mennast.
Miðøkið blómar nú, men tað ger partur av útjaðaranum ikki. Tí er nú tíð uppá, at føroyingar við opnum sinni mugu venda eygunum móti tí partinum av landinum, sum ikki er væl fyri.
Tíð er eisini pengar, verður sagt. Eingin kann longur góðtaka, at bíðitíðin at sleppa til útjaðaran (her Suðuroynna) er hin sama sum fyri 20 árum síðani. Hetta kostar dýrt í kappingarføri.
Samhaldsfasti hugburður okkara má gera, at tað ikki er munur á ferðakostnaði úr Vágum, úr Norðoyggjum og úr Suðuroynni. Stutt sagt: fleiri túrar og bílig 10-túrakort (ella kubbar, sum eru galdandi fyri undirsjóðartunlarnar og Smyril). Kundu vit funnið semjur um hetta, var nógv vunnið. Ber hetta ikki til, mugu vit ásanna, at solidaritetur har vit bera byrðar í felag - bara er galdandi fyri nøkur.
