Ein av vøkru oyggjum okkara er Stóra Dímun, og sum mong hava ynskt sær at vitja. Henda møguleikan hava teir umborð á Norðlýsinum givið fólki, og 2. hvítusunnudag vóru um 40 fólk útferð á oynni.
- Tað vísir seg, at fólki dámar sera væl henda túrin, sigur Birgir Enni, fyriskipari og skipari umborð á Norðlýsinum. Serliga væl dámar teimum, tá vit fara vestur um Skúvoynna og Sandoynna, eins og vit gjørdu henda dagin.
Teir hava skipað fyri hesum ferðunum síðani fyrst í 90unum. Hvussu nógvar tær eru, hevur hann ikki talið á.
- Men tær eru kanska 100 í tali ella fleiri. Eg veit tað ikki, sigur hann.
Tey sum ikki enn hava upplivað Stóru Dímun from the seaside, fáa aftur møguleika fyri hesum sunnudagin.
- Vit eru púrasta bundin at veðrinum, og tí fáa vit ikki altíð lýst við túrunum í góðari tíð. Men veðurforsøgnin boðar í øllum førum frá góðum, og tí verður lagt til brots aftur sunnudagin, sigur Birgir Enni.
(Mynd: Jógvan Jón Petersen)
