Eysturríkarin Felix Baumgarten, sum fyri næstan tveimum vikum síðani gjørdi nógv umtalaða lopið úr rúmdini, hevur nú boðað frá, at hann steðgar við tí heldur serliga ítrivinum.
- Eg havi tikið avgerð um, at hatta var tað seinasta ekstrema lopið, sum fólk fara at síggja meg gera, segði Baumgarten týsdagin, tá hann hitti aðalskrivaran í ST, Ban Ki-moon.
Teir báðir prátaðu um tað ekstrema lopið, har Baumgarten setti ikki færri enn fýra heimsmet. Og tað vakti virðing hjá aðalskrivaranum í ST.
- Eg helt, eg fór at fáa hjartasteðg, segði Ban Ki-Moon, sum eins og hinar átta milliónirnar av fólkum fylgdi við á internetinum, tá Baumgarten fór við fullari ferð móti jørðini.
Aðalskrivarin kallar eysturríkaran fyri heimsins djarvasta persón, og Baumgarten fortelur, at hann er tilreiðar at samstava við ST í framtíðini.
