Á tá vit skriva 28. mars í dag, so er tað eisini føðingardagur felagsins, sum í dag fyllir 34 ár.
Tá felagið byrjaði flúgving 28. mars í 1988 hevði felagið eitt flogfar, sum varð keypt nýtt úr Onglandi.
Í Sønderborg var støðin hjá Cimber Air, sum var danska flogfelagið, sum hjálpti Atlantic Airways í gongd. Nýggjar flogfarið hjá Atlantic Airways kom til Sønderborg úr Onglandi 21. mars 1988, har tað varð málað í litunum hjá Atlantic Airways og kom fyrstu ferð til Føroya 26. mars 1988. Tá flogfarið so kom í Vágar var móttøka við horn- blástri og røðum. Aftaná varð farið á flog ein rundtúr yvir Føroyum við innbodnum gestum.
Tann 28. mars í 1988 kl. 8.35 lætti flogfarið úr Vágum og setti kós móti Keypmannahavn á sínum fyrsta túri við ferðafólki, har Keypmannahavnar flogvøllur skipaði fyri móttøku.
Fara at selja ferðaseðlar
Sølan av ferðaseðlum var byrjað 1. mars. Felagið hevði fingið góðkent eina ferðaætlan at galda frá 28. mars við fráferð úr Vágum kl. 08.35 og komu til Keypmannahavnar kl. 11.35. Síðan avstað aftur úr Keypmannahavn kl. 19.00 til Vágar, har tað setti seg kl. 20.40. Í juni, juli og august var eykatúrur settur inn úr Føroyum kl. 15.00.
Orsøkin til, at flogfarið sambært ætlanina stóð í Keypmannahavn millum 11.35 og 19.00 var, at munnlig avtala var gjørd við SAS um at leiga flogfarið við manning í hesum millumbili. SAS megnaði tó ikki at halda avtaluna vegna mótstøðu frá teirra manningarfeløgum.
Nevndin í Atlantic Airways hevði á fyrsta fundi sínum tann 15. desember 1987 samtykt at seta tveir skiparar og tríggjar stýrimenn umframt átta flogternur, og at Jógvan Simonsen saman við Erik Koch, flogovasta hjá Cimber Air, skuldu standa fyri hesum arbeiði. Tann 28. mars var manningin klár at byrja sítt starv – ogharvið byrjaði eitt nýtt tíðarskeið í føroyskar flogsøgu.
##med2##
Flogarið kemur í Vágar
28. mars 1988 var ein hátíðardagur fyri føroysku tjóðina, sum nú fyri fyrstu ferð nakrantíð kundi fara á flog á føroyskum veingjum. Men stovnanin av flogfelagnum hevði tó verið alt annað enn løtt. Ein samanrenning av miðvísi, hepni og tilvild hevði gjørt dreymin hjá føroyingum um egið flogfelag til veruleika.
Eina løtu var ivi, um felagið fór at hóra undan. Men brádliga vendist gongdin, og ferðafólkatalið fór aftur at vaksa og er vaksið støðugt síðani. Virksemið í felagnum øktist, flogfør løgdust afturat flotanum, flogið varð til fleiri ferðamál, starvsfólkahópurin vaks, og felagið gjørdi fleiri stórar sáttmálar um leiguflúgving uttanlands.
Í 2007/08 hevði Atlantic Airways sjey flogfør og tvær tyrlur í flotanum og 277 ársverk vóru í felagnum. Tá ið farið var undir at leingja flogvøllin í Vágum í 2010, lat hetta upp fyri fleiri nýggjum møguleikum hjá føroyska flogfelagnum. Gjørt varð av at skifta British Aerospace flogførini út við flogfør av slagnum Airbus. Og bert fýra mánaðir eftir, at flogvøllurin stóð liðugur, lendi fyrsta Airbus A319 flogfarið í Vágum í mars mánaði í 2012.
##med4##
Bøttu munandi um reglusemið
Flogførini bøttu eisini munandi um bæði rutunetið og reglusemið til og úr Føroyum. Atlantic Airways var fyrsta flogfelag í Evropa at brúka nýggju og framkomnu navigatiónstøknina, RNP AR 0.1.
Nýggju flogførini kundu eisini flúgva munandi longur enn tey gomlu flogførini, og føroyingar merktu tað longu sama summarið, tá ið fyrsta SÓL-rutan til Barcelona sá dagsins ljós.
Flotin hjá Atlantic Airways telur trý flogfør og tvær tyrlur. Í 1994 yvirtók Atlantic Airways rutuflúgvingina millum oyggjarnar frá Strandfaraskipum Landsins, og hesa uppgávu hevur felagið røkt síðani.
##med3##
Í 2015 og 2016 vórðu gomlu Bell tyrlurnar í flotanum skiftar út við tvær spildurnýggjar og nýtmótans AgustaWestland AW139 tyrlur. Tær eru bæði rúmligari og kunnu flúgva heilt út á 200 fjórðinga sjómarkið, har tær kunnu arbeiða í 30 minuttir í bjargingarátøkum. Hetta hevur stóran týdning, tí Atlantic Airways er partur av tilbúgving Føroya, sum merkir, at hvønn dag á árinum, alt samdøgrið, er ein tyrlumanning tøk og kann fara avstað í eini handavend.
Í desember 2016 fekk Atlantic Airways aftur eitt flogfar: ein spildurnýggjan Airbus A320. Í sambandi við, at nýggja flogfarið kom til Føroya, gjørdi Atlantic Airways av at geva flotanum nøvn. Flogfør og tyrlur eru nú nevnd eftir mætum, føroyskum listafólkum.
Flogførini eita William (Heinesen), Tita (Vinther) og Ingálvur (av Reyni), og tyrlurnar hava fingið nøvnini Sámal (Joensen-Mikines) og Ruth (Smith).
