Nú tað stundar til jól, er hetta eisini tíðin, tá gásarungarnir verða slaktaðir og gjørdir klárir til døgurðan jólaaftan. Og hetta var júst tað, sum feðgarnir, Thomas og Kári Petersen á Sandi, tókust við seinnapartin í dag, tá In.fo vitjaði inni á gólvinum.
Feðgarnir hava tvey gásapør, sum tilsamans fingu 16 ungar í vár. Ein ungi doyði í einari veit, meðan hann enn var lítil, og so vóru 15 ungar eftir. Annað gásaparið hevur gingið í Todnesi, og hitt hevur seinastu tíðina gingið Uppi í Nesi.
Í dag vórðu allir gásarungarnir tiknir, avlívaðir, skoldaðir, reinsaðir og gjørdir klárir til jóladøgurðan. Vektin lá um góðar 20 merkur. Onkur datt beint niður um, og hin besti táttaði í 24 merkur. Feðgarnir vóru nøgdir við vektina og skurðin í dag.
