Fyrru 1/8-finalurnar í Europa League hava verið í kvøld, har einans eitt enskt lið er eftir í kappingini, nevniliga Manchester United, meðan onnur eygu her um leiðir helst eisini hava fylgt við danska meistaraliðnum FCK.
Manchester United var í kvøld á útivølli ímóti russiska FC Rostov, og har gjørdist tað til 1-1-javnleik. Henrikh Mkhitaryan legði United á odda 10 minuttir fyri hálvleikssteðgin, men stutt inn í seinna hálvleik javnaði Aleksandr Bukharov til endaliga úrslitið, 1-1.
Heima í Parkini hevði FCK í kvøld vitjan av Ajax. Rasmus Falk legði heimaliðið á odda longu í 1. minutti, men danska stórtalentið hjá Ajax, Kasper Dolberg, syrgdi fyri at hálvleiksstøðan var 1-1. Eitt lítið korter inn í seinna hálvleik legði Andreas Cornelius FCK á odda 2-1, og hetta gjørdist eisini úrslitið.
Returdystirnir verða spældir komandi hóskvøld.
Øll úrslitini í Europa League í kvøld:
FC Rostov – Manchester United 1-1
FCK – Ajax 2-1
APOEL – Anderlecht 0-1
Olympiakos – Besiktas 1-1
Lyon – Roma 4-2
Gent – Genk 2-5
Shalke 04 – Borussia Mönchengladbach 1-1
Celta Vigo – Krasnodar 2-1
