FC Suðuroy og 07Vestur kappast um plássið aftanfyri TB og harvið um uppflytingarpláss. Í dag dystaðust hesi bæði liðini í Sandavági. Úrslitið var 1-1, og harvið er FC Suðuroy framvegis eitt stig undan vágaliðnum.
Torstein Mýlingstind legði stutt eftir steðgin heimaliðið framum. Hetta var níggjunda málið hjá honum í ár. Torstein plagdi at vera verjuspælari. Síðani hann fyrr í summar varð fluttur fram í álopið, hevur hann skorað mest sum hvørja ferð. Burtursæð frá í 19. umfari hevur hann í øllum dystunum síðani 16. umfar og fram til 22. umfar skorað í hvussu so er eitt mál. 18 ára gamli Búi Egilsson er toppskjútti hjá FC Suðuroy við níggju málum. Í dag javnaði hann tríggjar minuttir undan leikloki til 1-1. At FC Suðuroy megnaði at javna og harvið at vinna eitt stig kann fara at vísa seg at vera avgerandi í tvíkappingini um at flyta upp.
Fyri fyrstu ferð í hesum kappingarárinum noyddist TB av vøllinum í dag við ongari úrtøku. Uppflytararnir og gullvinnararnir taptu fyri fyrstu ferð í 2014 landskappingini á heimavøllinum við Stórá. Mótstøðuliðið í 22. umfari var Víkingur, sum vann 1-0. Málið skoraði 18 ára gamli Magnus Jarnskor miðskeiðis í 2. hálvleiki. Sigurin ber við sær, at tað framvegis er eitt glopp frá Víkingi og aftur til KÍ og HB.
Hesi bæði liðini dríva á fyri at sleppa frá at vera undir strikuni. KÍ hevur verið í stórum vanda fyri at flyta niður. Mikukvøldið vunnu klaksvíkingar 2-0 á heimavølli ímóti EB/Streymi, og í dag vunnu teir 4-0 á útivølli ímóti AB. Eitt korter var farið, tá ið Jens Pauli Mohr setti hol á, og eftir lítlari løtu tíðliga í 2. hálvleiki øktu Jóannes Danielsen og Jósup Henriksen um leiðsluna. Hóast KÍ misti ein mann, tá ið tað restaði ein lítil hálvur tími, so svaraði AB ikki aftur, og í síðsta minutti staðfesti Bárður Hansen rimmar KÍ sigurin á Argjum.
HB er framvegis undir strikuni, hóast tað í dag endaði við 2-0 sigri í grannauppgerðini í Gundadali. HB hevur burtur úr seks teimum seinastu umførunum vunnið fjúrtan stig – fýra sigrar og tveir javnleikir. 16 ára gamli Adrian Justinussen skoraði fyrra málið, og tað seinna var sjálvmál. Adrian Justinussen var mikukvøldið fyri fyrstu ferð á næstbesta liðnum, og tá skoraði hann eisini.
Í kvøld tapti EB/Streymur 2-1 á heimavølli ímóti NSÍ, sum er leyst av botninum og ikki hevur so stóran møguleika at røkka heiðurskerjaplássi. Tíðliga í 2. hálvleiki løgdu 17 ára gamli Meinhard Olsen og 16 ára gamli Petur Knudsen NSÍ framum 2-0. Ólavur Ejdesgaard minkaði stutt undan leikloki um munin við brotssparki. Tapið ber við sær, at tað ikki sær so gott út hjá EB/Streymi, sum er fýra stig aftanfyri HB og seks stig frá plássinum omanfyri strikuna. Sigurin ber við sær, at NSÍ lyfti seg upp um B36, og at NSÍ harvið er á fjórða plássi.
EB/Streymur-NSÍ 1-2 (0-0)
0-1: Meinhard Olsen 54.
0-2: Petur Knudsen 60.
1-2: Ólavur Ejdesgaard br 88.
07Vestur-FC Suðuroy 1-1 (0-0)
1-0: Torstein Mýlingstind 50.
1-1: Búi Egilsson 87.
HB-B36 2-0 (1-0)
1-0: Adrian Justinussen
2-0: sjálvmál
AB-KÍ 0-4 (0-1)
0-1: Jens Martin Pauli Mohr 15.
0-2: Jóannes Danielsen 50.
0-3: Jósup Henriksen 54.
0-4: Bárður Hansen 90.
Reytt kort: Gunnar Christiansen, KÍ, 62. (beinleiðis reytt)
TB-Víkingur 0-1 (0-0)
0-1: Magnus Jarnskor 68.
Støðan
TB 59
FC Suðuroy 38
07Vestur 37
NSÍ 31
B36 31
AB 27
Víkingur 25
KÍ 22
HB 20
EB/Streymur 16
23. umfar
Fríggjadagin 22. august
B36-NSÍ
Leygardagin 23. august
Víkingur-07Vestur
EB/Streymur-AB
HB-FC Suðuroy
TB-KÍ
