Tað er ein bági fyri FAS, at ov fá hagtøl finnast, sum lýsa virksemið í vinnuni. Hóast hetta er roknistykkið sera einfalt, tí tá skipanin lítla ella onga játtan hevur, so er alt virksemið nettoinntøkur til førloyska samfelagið.
Í ársfrágreiðingini verður sagt, at tað er týdningarmikið at leggja aftrat, at FAS-skipanin er einasta orsøkin til, at útlendsku reiðaríini koma til Føroya at skapa virksemi á landi og umstøður fyri vitanartungu sjóvinnuna at vaksa.
Aðrar skipaskrásetingar kunnu bjóða minst líka góðar fíggjarligar treytir sum FAS. Kortini velja útlendsku reiðaríini Føroyar, tí teir kenna seg aftur í okkara sjómentan. Talan er um eina mentan, sum er um at hvørva í okkara grannalondum.
Av tí at fá hagtøl finnast, ið vísa inntøkurnar hjá føroysku sjóvinnuni, er torført at vísa á neyv tøl. Men við at kaga í roknskapirnar hjá føroyskum feløgum innan sjóvinnu og spyrja nærri í vinnuni, eru komin fram tøl, ið vísa árligu lønarútgjaldingarnar í 2011 til størv í FAS-umsitingini á landi.
Hetta eru varisligar metingar og tølini skuluu ikki yvirmetast.
Innan Ship Management er talan um 119 ársverk til eitt virði á 54.264.000 krónur, sakførarar skapa tvey ársverk fyri 1.680.000 krónur, grannskoðarar trý ársverk á 1.800.000 krónur, reiðara- og manningarfeløg eitt ársverk á 480.000 krónur.
Hetta gevur tilsamans eina FAS umsiting í 2011 á 58.224.000 krónur.
Nógvan skatt
Fyri at fáa atgongd til FAS-lønarskipanina krevst, at umsitingin av lønar- og hýsusáttmálum er í Føroyum, og reiðaríini mugu hava føroyskt bankasamband.
Harumframt skulu øll partafeløgini hava føroyskan grannskoðara. Fleiri føroysk feløg, nøkur nýstovnað, taka sær av hesi umsitingini vegna útlendsku reiðaríini. Í hesum sambandi er vert at leggja til merkis, at fleiri føroyingar, ið hava arbeitt innan skiparakstur í grannalondunum, hava gjørt av at flyta heim, nú teir hava møguleika at brúka útbúgving og royndir sínar í vinnuni her.
Tað er eisini álagt útlendskum reiðaríum at hava føroyskt umboðsfólk. Flestu útlendsku reiðaríini velja eisini at hava føroyingar í nevndini, tá teir stovna partafeløg í Føroyum. Tískil verða nevndar- og aðalfundir ofta hildnir í Føroyum.
Tøl fyriliggja ikki, sum vísa lønina hjá hesum umboðum ella nevndarlimum, men tað skilst, at hetta er væl lønt arbeiði.
Tað ber ikki til at síggja, hvussu nógv partafeløgini rinda í skatti, tí hetta verður ikki eyðmerkt í skipanini hjá TAKS, men skráseting, tjóðarbræv og pant fyri 2011 gav 1,171 milliónir, málibrøv góvu 74.118 krónur viðurkenningarprógv 112.274 krónur og ársgjøld 1.722.158 krónur, ella eina beinleiðis inntøku á tilsamans 3.079.550 krónur.
Í 2011 fekk TAKS 29.112.000 krónur inn í skatti frá FAS avleiddum virksemi, meðan arbeiðsmarknaðargrunnar fingu 16.689.860 krónur frá FAS avleiddum virksemi á landi og føroyskum sjófólki í FAS.
Flogferðaseðlar og gisting geva eisini nakað av inntøkum, eins og tryggingarfeløg fáa inntøkur frá FAS skrásettum skipum.
