Nú kann tað henda, at reglur fara at verða settar fyri, hvussu fartelefonir skulu brúkast í Løgtinginum.
Tað hendir seg javnan og savnan, at fartelefonir ringja mitt undir tingfundum, tí tingfólk geta tær ikki ljóðleysar.
Tað er heldur ikki óvanligt, at tinglimir tosa í fartelefon inni í tingsalinum mitt undir tingfundi.
Hóast tingformaðurin áhaldandi minnir tingfólk á at vanda sær um fartelefonirnar í Løgtinginum vísir tað seg ikki at gera mun.
Aftur ímorgun varð tingfundurin órógvaður av ringjandi fartelefonum.
Tað fekk einaferð enn løgtingsformannin, Páll á Reynatúgvu, at minna á, at tingfólk skulu ikki órógva við fartelefonum.
Hann minti eisini á, at fleiri skúlar hava reglur fyri, hvussu næmingar kunnu brúka fartelefonir í skúlanum. Og talan kann verða um tað sama í Løgtinginum, staðfesti Páll á Reynatúgvu.
