Felagið stendur á einum vegamóti og er veruliga við at fáa fótafesti á altjóða marknaðinum skrivar íløgudeild hjá Føroya Banka. Íløga í FP er spennandi men eisini váðafull Nýggjar greiningar av Faroe Petroleum seta kursin hjá felagnum til ávíkavist 175 pence og 250 pence komandi 12 mánaðirnar. Verandi kursur er umleið 135 pence stendur á heimasíðuni hjá Føroya Banka. Íløgudeildin hjá Føroya Banka metir, at ein íløga í Faroe Petroleum kann vera ein spennandi íløga, og at marknaðarvirðið hjá felagnum kann hækka við einari milliard. Tó vísir hon á, at ein íløga í Faroe Petroleum er váðafull
Faroe Petroleum hevur í dag eitt marknaðarvirði á eina góða milliard føroyskar krónur, men hetta virðið kann hækka komandi mánaðirnar, meta virðisbrævagreinararnir Daniel Stewart & Co og Tristone Capital Ltd.
Daniel Stewart & Co metir, at kursurin hjá Faroe Petroleum kann fara upp á 170 pence. Hendir hetta, verður virðið á felagnum 1,4 milliard krónur. Tristone Capital Ltd. setir kursin til 250 pence. Við hesum kursinum verður virðið á felagnum umleið tvær milliardir krónur.
Íløgudeildin hjá Føroya Banka hevur við støði í báðum greiningunum gjørt eina støðulýsing av Faroe Petroleum. Ein niðurstøða hjá íløgudeildini er, at ein íløga í Faroe Petroleum tykist vera ein spennandi íløga.
?Felagið stendur á einum vegamóti og er veruliga við at fáa fótafesti á altjóða marknaðinum. Faroe Petroleum broytist frá at vera eitt nýbyrjað oljufelag til at vera ein partur av altjóða marknaðinum. Hesa tilgongd tykist felagið at taka við størsta álvara og fyrivarni,? skrivar íløgudeildin hjá Føroya Banka í síni støðulýsing.
Íløgudeildin vísir eisini á, at Faroe Petroleum, sum í løtuni er skrásett á virðisbrævamarknaðinum í London, arbeiðir við ætlanum um at lata seg tvískráseta í Oslo ella Keypmannahavn. Hendir hetta, fer tað at bøta um gjaldførið í partabrævinum.
Í støðulýsingini verður tó samstundis víst á, at váði er knýttur at eini íløgu í Faroe Petroleum.
?At munurin millum málkursirnar hjá greinarunum er stórur, vísir, at óvissan at meta um virðið á felagnum er stór. Havast skal í huga, at Faroe Petroleum er eitt lutfalsliga nýtt felag, og at ein ávísur vandi altíð er til staðar hjá einum felag, ið framvegis er í byrjunarskeiði,? stendur í støðulýsingini verður greitt frá á heimasíðu bankans.
