Faroe Petroleum á sigursgongd á Atlantsmótinum

Faroe Petroleum er eitt av feløgunum, sum veruliga hev­ur vind í seglunum á At­lantsmótinum. Felagið hevur fingið tillutað fýra nýggj leitiloyvi á økinum vestan fyri Hetland í 26. út­bjóð­ingar­umfarinum í Bret­landi. Felagið er fyristøðu­felag á øllum fýra loyvunum.
Felagið hevur, saman við øðrum oljufeløgum, fingið tillutað fylgjandi loyvi:
Grouse – Faroe Petroleum 37.5%
Leitiloyvið liggur á Corona Rygginum vestan fyri Hetland og sunnanfyri Lagavulin prospektið, har borað verður í løtuni (Faroe Petroleum hevur 10% av hesum loyvi). Verkætlanin fevnir um nýggjan 2D seis­mikk, keyp og viðgerð av verandi 2D seismikki, og aðrar tekniskar kanningar, áðrenn støða verður tikin um at bora á loyvinum.
Balblair – Faroe Petrol­eum 50% og Ardberg – Faroe Petroleum 50%. Hesi leiti­loyv­ini á Atlantsmótinum liggja ímillum Talisker leiti­loyvið, sum Faroe Petroleum eigur part av, og bretska og norska sjómarkið. Verk­ætlanin fevnir um nýggjan 2D seismikk, keyp og viðgerð av verandi 2D seismikki, og aðrar tekniskar kanningar, áðrenn støða verður tikin um at bora á loyvinum.
Aileen – Faroe Petroleum 50%. Leitiloyvið liggur eyst­an fyri Tornado fundið, sum felagið eisini eigur part av, og vestan fyri tað risa­stóru Clair oljuleiðina. Verkætlanin fevnir um keyp og viðgerð av 2D seismikki, viðgerð av 3D seismikki og aðrar tekniskar kanningar, áðrenn støða verður tikin um at bora á loyvinum. Faroe Petroleum er sera fegið um nýggju loyvini, sum øll liggja á einum av teirra kjarnu­økjum. Felagið hevur fingið stóran prosentpart av loyvunum, eins og at felagið er fyri­støðu­felag á øllum fýra loyv­unum. Hetta sigur nógv um førleikan, sum felagið hevur bygt upp á Atlantsmótinum, har felagið í fjør fann kolvetni á Tornado loyvinum.
Graham Stewart, stjóri í Faroe Petroleum sigur, at tey eru sera væl nøgd við loyvini felagið hevur fingið tillutað á Atlantsmótinum, sum er eitt av kjarnuøkjunum hjá felagnum. Felagið hevur longu brúkt nógva orku uppá at búna verandi loyvi í hes­um umráði og við nýggju loyvunum ber til at troyta vitanina felagið hevur fingið enn betri.