Faroe Petroleum hevur gjørt avtalu við E.ON Ruhrgas um trý loyvir, ið fevna um gassframleiðslu, útbygging av einum gassfelti, og eitt norskt leitiloyvi
Avtalan inniber í fyrsta lagi, at Faroe Petroleum fær: 4,83% av bretska gassframleiðsluloyvinum Schooner. Mett verður, at 64 milliardir kubikk føtur av gassi (svarandi til 10,7 mió. tunnur av olju) eru eftir í kelduni; parturin hjá Faroe Petroleum av hesum er 3,1 milliardir kubikk føtur (svarandi til 500.000 tunnur av olju).
Í øðrum lagi gevur avtalan Faroe Prtroleum 7,5% av bretska gassfundinum Topaz. Mett verður, at 32 milliardir kubikk føtur av gassi (svarandi til 5,3 mió. tunnur av olju) eru í kelduni; parturin hjá Faroe Petroleum av hesum er 2,4 milliardir kubikk føtur (svarandi til 400.000 tunnur av olju)
Í triðja lagi fær Faroe Petroleum 10% av norska leitiloyvinum PL376. Ein brunnur skal borast á loyvinum í 2008. Leitiloyvið liggur nær við framleiðsluøkið Gjøa og gass-fundið Agat.
Umframt umbýtið av loyvum millum feløgini, skal Faroe Petroleum gjalda góðar kr. 70 mió., og gjalda fyri ein part av boriútreiðslunum hjá E.ON Ruhrgas á loyvi PL376.
Handilin er treytaður av, at myndugleikar og loyvishavarar góðtaka avtaluna.
Faroe Petroleum eigur nú í 7 gassloyvum, sum annaðhvørt eru í framleiðslu ella koma í framleiðslu. Inntøkurnar frá framleiðsluni fíggja ein part av leitiútreiðslunum hjá felagnum, sigur Faroe Petroleum um tíðindaskrivi.
