Tilsamans 4000 luttakarar úr 160 londum kappast í 20 ymsum ítróttargreinum í Paraolympisku leikunum í hesum døgum. Sandoyingurin Ragnvaldur Jensen svam hósdagin 100 metra bringusvimjing. Hann gjørdist nummar 12 við tíðini 1:13:92, ið er næstan neyvt sama tíðin, sum hann kom til Paraolympisku leikirnar uppá. Tann tíðin var 1:13:89, ið svaraði til eitt 10. pláss, men av tí, at hinir svimjararnir stóðu seg sera væl hósdagin, so rakk tíðin á 1:13:92 ikki til finalu pláss.
At koma til leikirnar er at rokna sum ein sigur í sjálvum sær. Tað skulu Ragnvaldur og hinir 4000 luttakararnir eisini minnast til at fegnast um, hóast tað løtuna eftir kappingina, har tað ikki gekk akkurát sum ætlað, er ringt at minnast til.
Men meðan Ragnvaldur vónandi er farin at fegnast um luttøkuna í leikunum, fegnast vit í øllum førum hansara vegna, meðan vit lata okkum hugtaka av mongu ótrúligu avrikunum og fantastisku myndunum frá leikunum í London, sum enda sunnudagin.
