Men viðkomandi fer stórliga skeivur. Tíðindini eru als ikki tekin um, at kristindómurin hevur framgongd - tvørturímóti. Er tað nakað, sum bendir á, at danir eru í ferð við at venda aftur til tey kristnu lívsvirðini? Opiniónskanningar, sum av og á verðar gjørdar í Danmark, tala ikki fyri, at kristindómurin er hátt í metum. At færri og færri lata børn síni doypa og læra upp í kristiliga barnalærdóminum, vísir best lága barometurstandin.
Í Føroyum lata so at siga øll fólkakirkjulig foreldur børn síni doypa. Tað gevur seg eisini til kennar í, at guðstrúgvin støðugt situr føst í mongum føroyingum. Vist er tað, at um teir dagar koma, at dópstalið av børnum í Føroyum fer at fella, verður tað ikki ein ábending um at kristindómurin hevur framburð, men eitt sjúkratekin, sum avdúkar avkristnan.
