Jarvin Feilberg Hansen
-----------
Sum fyrrverandi formaður í Føroya pedagogfelag loyvi eg mær at koma við nøkrum viðmerkingum til politiska hurlivasan, sum gongur fyri seg í løtuni.
Fakfelagsrørslan umboðar sínar limir í eftirlønarviðurskiftunum. Hvørt einstakt fakfelag ger avtalur, vegna sínar limir, við eitt pensjónsfelag og í onkrum einstøkum førum verður hetta eisini gjørt við ein peningastovn. Hesar avtalur eru serstakar og gera feløgini tískil sjálvi av ,hvar tey halda tey fáa mest fyri peningin.
Hesar fortreytir verða nú, um tað stendur til samgonguna, broyttar við einum høggi. Endamál: At fíggja eina flatskattaskipan, har útrokningar hava víst, at tey lág og miðalløntu fáa lítið og onki burtur úr. Hetta verður gjørt omaná høvdið á fakfeløgunum. Hetta skal trumlast ígjøgnum her og nú. Fakfeløgini, sum hava staðið sterk saman um hetta málið, kunnu og skulu ikki finna seg í hesum. Gera tey tað – so gera tey ikki sítt arbeiði til lýtar. Fakfeløgini bóðu um fleiri fundir við løgmann, undir samgongusamráðingunum, men hetta varð alt skúgva til viks, tí hjartamálið hjá Fólkaflokkinum skuldi fyri ein og hvønn prís setast í verk.
Embætisfólk hava víst á 19 ymisk mál, sum tey í verandi løtu ikki kunnu standa inni fyri í hesi nýggju skattaskipanini – eisini hetta verður skúgvað til viks. Ein so týðandi stovnur sum Landsbankin , hevur somuleiðis gjørt sínar viðmerkingar – men hesar verða heldur ikki tiknar til eftirtektar.
Hví skal hetta skundast ígjøgnum? Hví ikki fáa eina breiða politiska semju um skattapolitikkin í Føroyum ? Ringt er kanska at semjast – men er tað kanska ikki eina roynd vert?
(Eg) Vil tískil heita á tey fólkavaldu, ið sita í Føroya Løgtingi, um at útseta hesar politisku ætlanirnar, so at ein møgulig fllatskattaskipan kann verða lýst betur.
Eg var sjálvur uppstillaður fyri Sjálvstýrisflokkin, sum nú er ein partur av hesi samgongu.Ein flokkur, sum vanliga stendur fyri einum sosial-liberalum politikki. Vælvitandi um, at mangt kann henda eftir eitt val, men at mín flokkur fór at stuðla einum politikki, sum nú tykist at síggja dagsins ljós, vardi meg ikki.
