Tey føroysku uppsjóvarskipini hava fiskað 116.500 tons av svartkjafti, síðani fiskiskapurin tók seg upp í altjóða sjógvi vestan fyri Írland í mars mánað.
Í mars fiskaðu skipini 17.500 tons í altjóða sjógvi. Eftir at sáttmálaviðurskiftini við ES vóru komin upp á pláss, fiskaðu skipini 38.000 tons í ES-sjógvi, og til í gjár høvdu tey fiskað 61.000 tons í føroyskum øki.
Tíggju føroysk skip hava verið á svartkjaftaleiðunum í ár. Tað er ymiskt, hvussu nógv tey hava fiskað, men tey hava heldur ikki roynt líka nógv, tí onkur teirra hava bara verið til fiskiskap ein part av tíðini.
Til í gjár sóu veiðitølini hjá skipunum soleiðis út:
Fagraberg 20.030 tons
Finnur Fríði 19.010 tons
Christian í Grótinum 17.380 tons
Jupiter 17.290 tons
Tróndur í Gøtu 11.830 tons
Norðborg 9.500 tons
Slættaberg 7.505 tons
Tummas T 5.730 tons
Næraberg 4.421 tons
Atlantsfarið 2.700 tons
Tilsamans 115.496 tons
