Tað eru sera fáir føroyingar, sum búgva til leigu. Av øllum teim 17.441 húskjunum í Føroyum vóru tað bert 2.022, ið búðu til leigu. Hetta svarar til 11, 6%.
Tað eru sostatt líka fáir leigarar í 2011 sum í 1977. Um vit samanbera við støðuna við síðstu fólkateljing 34 ár frammanundan, er onki hent hesum viðvíkjandi.
Tí tá vóru lutfalsliga líka nógvir – ella fáir – leigarar í Føroyum, nevnliga 11,7%. Samanbera vit við onnur lond í Europa eru tað somuleiðis sera fá í Føroyum, ið búgva sum leigarar.
Sum sæst av myndini omanfyrii, er tað bert í tveimum eystureuropeiskum londum, at tað lutfalsliga eru færri leigarar enn í Føroyum.
Av teimum 4.468 fólkunum, ið búgva til leigu í Føroyum, búgva heili 61% í Suðurstreymi. Knappliga 30 % búgva í Norðoyggjum, Eysturoy og Norðstreymi, og 9% búgva í Vágum, Suðuroy og Sandoy.
