Tann 24. februar til 4. mars skal fótbóltslandslið okkara á árligu venjingarleguni, sum í ár aftur er í La Manga. 22 mans hava fingið boð, og av teimum eru 11 at finna í teimum báðum høvuðsstaðarfeløgunum.
Aftrat teimum 22 leikarunum, eru tíggju leiðarar, so tilsamans sendir Fótbóltssambandi 32 mans til Spaniu í eina góða viku.
Tríggir venjingardystir standa á skránni, meðan landsliðið er í Spania. Hesir eru móti finskum, sponskum og svenskum liði.
Leikararnir, ið hava fingið boð, eru hesir:
Rasmus Nolsøe, Jákup á Borg, Kári Nielsen, Christian Høgni Jacobsen og Rógvi Jacobsen úr HB. Jákup Mikkelsen, Fróði Benjaminsen, Hanus Thorleifsson, Bergur Midjord, Mikkjal Thomassen og Herbert í Lon Jacobsen úr B36. Meinhardt Joensen og Atli Danielsen úr KÍ. Marni Djurhuus og Hans Pauli Samuelsen úr EB/Streymi. Pauli Hansen og Jonhard Frederiksberg úr Skála. Óli Johannesen úr TB, Sámal Joensen úr GÍ, Hjalgrím Elttør úr NSÍ. Tvinnir eru útisetarnir á liðnum hesaferð, Andrew av Fløtum úr Fremad Amager, og Símun Samuelsen úr Keflavík.
Leiðarar á ferðini eru hesir:
Jens Erik Magnussen, ferðaleiðari, Jógvan Martin Olsen, landsliðsvenjari, John Petersen, hjálparvenjari, Jens Martin Knudsen, málmansvenjari, Jens Pauli Marstein, lækni, Álvur Hansen og Øssur Steinhólm, fysioterapeutar, Birgir Hansen og Sigurð Hansen, liðleiðarar og Hans Erik Danielsen, miðlamaður.
