Leygardagin fara bæði ung og gomul at sláa tunnu á Sandi. Føstulávint hevur altíð verið hildin væl og virðiliga á Sandi, og at verða kattakongur hjá teimum vaksnu forpliktar – allur riðilin, sum sligið hevur, verður boðin inn til kattakongin og -drotningina. Tí sjálvandi eru kvinnurnar komnar upp í part, sum tíðirnar eru broyttar.
Tunnuslátturin byrjar klokkan 13 við at børnini sláa tunnu í Virkinum, tey smæstu fyrst, og kl. 15.00 sláa fyrst kvinnurnar, síðani menninir. Seinni um kvøldið, tá fólk hava vitjað kattakong og -drotning og verið húsagongd, er aftur opið í Virkinum sum café-kvøld frá kl 21.00.
Men føstulávintin byrjar í veruleikanum longu hóskvøldið, tá føstuskemtið verður sýnt fyrstu ferð. Fyrireikingarnar til føstuskemtið byrjaðu væl fyri jól, so tey stuttligu prikini og festligu sangirnir eru væl vand! Hóskvøldið klokkan 20.00 er fyrsta sýningin. Hinar sýningarnar eru fríggjakvøldið kl. 20.30 og sunnudagin kl. 16.00, 19.00 og 21.00.
