- Nú síggjast fyrstu úrslitini av teirri føroysku hjálpini til fiskivinnusamfelagið í Banda Aceh, sum varð lagt í sor eftir tsunami-flóðalduna í 2004, sigur Fernando Soares frá felagsskapinum Mercy Corps. Fernando var í farna mánaði gestur í Tinganesi, har hann kunnaði løgmann og landsstýrið um henda hjálparfelagsskapin og teirra virksemi kring heimin.
Á sumri 2005 fekk hesin felagsskapurin 1 mió føroyskar krónur beinleiðis til at endurreisa fiskivinnusamfelagið í Banda Aceh á oynni Sumatra í Indonesien eftir tsunami-flóðalduna.
Hóast føroyska ískoytið kann tykjast lítið í mun til allar tær hundraðtals milliónirnar sum koma aðrastaðni frá, so er Fernando sannførdur um, at tann føroyska hjálpin ger mun.
Hann vísir til støðuna í Banda Aceh í februar 2007 í mun til desember 2004. Eftir flóðalduna lá allur hesin fiskivinnubýurin í sori. Tað var ikki hugsingur um nakað vinnuligt virksemi.
- Men við hjálpini frá tykkum er býurin nú við at koma fyri seg aftur: Bátar verða umvældir, fiskamarknaðurin verður endurreistur og seinni verður helst eisini eitt ísvirki sett upp.
- So her hevur tykkara hjálp verið til ovurstóra gagn og gleði hjá tí einstaka útróðrarmanninum - og ikki minst í samfelagnum rundan um hann, slær Fernando fast.
Felagsskapurin Mercy Corps arbeiðir í 35 londum, men hevur haraftrat samstarv við gevarar í uppaftur fleiri londum, millum annað umvegis Løgmansskrivstovuna í Føroyum.
Hetta er ikki hvør sum helst felagsskapur. Mercy Corps er nevniliga í uppskoti til at fáa friðarheiðursløn Nobels!
