Týskvøldið var frumframførslan av dansisýningini The Architecture of Loss, og Guðrun & Guðrun og Rannvá Kunoy áttu part í sýningini.
Enn einaferð hava føroysk listafólk vunnið sær viðurkenning uttanfyri Føroyar hesaferð í New York.
Guðrun & Guðrun hava sniðgivið búnarnar til teir 11 dansararnar, og Rannvá Kunoy hevur gjørt myndirnar til pallin.
Urd Johannesen, umboð fyri Norðurlandaráðið er í hesum døgum í New York, og var eisini við til framførsluna.
- Frumframførslan var sera væl móttikin, og føroysku luttakararnir vóru fagnaðir, og hava fingið nógv rósandi orð fyri bæði design og myndir, greiður Urd frá í dag.
Norðurlandahúsið, Mentamálaráðið og aðrir føroyskir stovnar hava stuðlað dansisýningini, og Norðurlandahúsið hevur átikið sær tann Norðurlendska partin, sum umframt Guðrun & Guðrun og Rannvá Kunoy eisini umfatar íslendska tónasmiðin Valgeir Sigurðsson.
- Tað var ein stór løta at síggja føroyskt design og føroyska list trína á pallin í New York. Eg haldi veruliga vit hava sett føroyska list á heimskortið, staðfestir Urd Johannesen.
Mikukvøldið var eitt tiltak á skránni, sum eitur New York Celebrates the Faroe Islands á Scandinavia House, har eitt nú pløgg hjá Guðrun & Guðrun vóru sýnd fram, eins og nakrar framløgur vóru á skránni.
