Elnar Niclasen er skipari á Mærsk Ras Laffen, sum týsdagin var júst rætta stað til røttu tíð. Og tá stóð hann á odda fyri stórari bjarging í Persaraflógvanum, har seks iranar vóru farnir í bjargingarbátarnar, tá ið støðan á iranska farmaskipinum gjørdist hættislig.
- Stýrimaðurin segði mær, at okkurt løgið var á sjónum. Tað tóktist mest sum, at skipið lá og fleyt, greiðir Elnar Niclasen frá.
Meðan Mærsk Ras Laffen sigldi móti iranska farmaskipinum, sendu menninir eina neyðrakket upp, og Elnar Niclasen var skjótur at broyta kós.
- Við vendu skipinum beinanvegin, og løgdu okkum so tætt at iranska farmaskipinum sum gjørligt, greiður Elnar Niclasen frá.
Tað var trupult, at koma heilt nær at skipinum, tí lutir frá farmaskipinum vóru spjaddar kring økið.
- Yvirstýrimaðurin og aðrir fóru út til bjargingarbátin, og fingu hjálpt monnunum umborð á okkara skip, og tað gekk umleið hálvur tími, so kom eitt skip eftir monnunum, sum tá vóru umborð hjá okkum, greiðir Elnar Niclasen frá.
Stjórin í Mærsk LNG, Claus Thomsen sigur í dag, at tey fegnast um, at føroyski skiparin var so mikið kvikur og dugnaligur, at hann megnaði at bjarga øllum seks monnunum.
Eisini iranska felagið, sum eigur farmaskipið, hevur sent eitt takkarbræv til Elnar Niclasen og hansara manning, og takka teimum fyri at hava bjargað monnunum.
