Anfinn Kallsberg hevur um vikuskiftið verið í Grønlandi, har ríkisfundur hevur verið millum politisku leiðararnar í Føroyum, Grønlandi og Danmark.
Árligi ríkisfundurin varð hesaferð hildin í suðurgrønlendska býnum, Narsaq.
Anfinn Kallsberg, Jonathan Modzfeldt og Poul Nyrup Rasmussen viðgjørdu ymisk mál á ríkisfundinum, sum hava áhuga fyri teir tríggjar partarnar av ríkinum.
Anfinn Kallsberg greiddi grønlendska landstýrisformanninum frá, at føroyingar kenna ávísar skyldur mótvegis grønlendsku náttúruni.
? Um órudd frá føroyskum útróðri í Grønlandi er til ampa fyri grønlendingar og grønlendsku náttúruna, so skulu føroyingar rudda eftir sær, segði Anfinn Kallsberg.
Løgmaður hevur borið eygað við óruddið í sjónvarpssendingum um føroyska útróðurin í Grønlandi, og hann heldur, at tað er ein sjálvfylgja, at føroyingar taka upp eftir sær. Føroyska og grønlendska landsstýrið skulu í næstum tosa aftur um hetta mál.
Hvalanevndin
Limaskapurin hjá Danmark í altjóða hvalaveiðukommisiónini,IWC, var eisini viðgjørdur á fundinum.
Grønland og Føroyar ynskja at fáa sín sjónarmið betri fram í IWC, og danski forsætisráðharrin hevur lovað føroyingum og grønlendingum, at málið verður tikið upp, so ein hóskandi loysn kann finnast.
Hvørki føroyingar ella grønlendingar hava kravt at fáa beinleiðis limaskap í IWC, men Anfinn Kallsberg og Jonathan Modzfeldt eru samdir um, at føroyingar og grønlendingar skulu hava størri ávirkan á donsku sjónarmiðini í IWC.
Ríkisfundur tekur ongar ítøkiligar avgerðir, men mál verða reist, og síðani verður arbeitt víðari við hesum málum.
