Aftur í fyrsta ársfjórðingi í ár tóku lønargjaldingarnar seg upp um tvær milliardir.
Tað sigur Hagstovan, sum hevur gjørt tølini upp. Og tað er bara hent eina ferð áður, at lønirnar hava verið yvir tvær milliardir í einum ársfjórðingi, og tað var í seinasta í fjør.
Tilsamans vóru árstíðarjavnaðu lønirnar 2.124 milliónir krónur í fyrsta ársfjórðingin í ár. Tað eru 29 milliónir, ella 1,4 prosent meira enn í undanfarna ársfjórðingini.
At lønirnar eru árstíðarjavnaðar, merkir, at lagt er upp fyri sveiggjum, sum árstíðirnar kunnu elva til.
Samanborið við fyrsta ársfjórðing í fjør, eru lønargjaldingarnar nú 176 milliónir krónur, ella níggju prosent hægri, enn tær vóru fyri einum ári síðani.
Hagstovan vísir á, at tá ið fíggjarkreppan rakti í 2008, minkaðu lønirnar, og ikki fyrr enn á heysti 2012 var fallið vunnið innaftur.
- Síðan var lítil og ongin broyting í eitt ár, men frá fjórða ársfjórðingi 2013 og til í dag, hevur verið ein javnur vøkstur.
Og nú lønirnar hesar báðar seinastu ársfjórðingarnar fóru upp um 2 milliardir, eru tær einar 300 milliónir hægri fyri hvønn ársfjórðing enn í 2008.
