Altjóða átakið Christmas Child gleðir á hvørjum ári neyðstødd børn við at geva teimum eina skógvaeskju við gávum á jólum.
Í ár eydnaðist tað føroyskum sjálvbodnum í hesari verkætlanini at savna 4.064 skógvaeskjur inn, sambært Christmas Child Føroyar.
Í hesum sambandi eru 4.064 skógvaeskjur beint nú á veg til Onglands og síðani víðari til neyðstødd børn í Rumenia.
- Vit vilja takka øllum føroyingum, sum hava pakkað eina eskju í ár. Vit mugu ikki gloyma, at hvør einstøk gáva er givin við gleði, og at hvør einstøk gáva fer at gleða og verma eitt barn í Rumenia, skrivar Christmas Child Føroyar.
