Føroyingaliðið, KA av Akureyri var úti í Vestmannaoyggjunum í kvøld og spældi dyst í bestu íslendsku hondbóltsdeildini.
Tað gekk framúr væl. KA vann 29-28 við einum sigursmáli sum var skotið beint undan seinasta bríksli.
Vestmannnaoyingar vóru tó ikki nøgdir við, at KA slapp at skora sigursmálið. Heimamennirnir meintu, at Patrekur Stefánsson sum skoraði sigursmálið hjá KA hevði skumpað Arnór Viðarsson hjá ÍBV beint áðrenn Patrekur meddaði bóltin í málið til 29-28, men dómararnir lótu málið standa, og KA fekk tvey stig við sær til Akureyrar.
Áki Egilsnes skoraði fimm mál fyri KA í kvøld og Allan Norðberg skoraði tvey mál. Nicholas Satchwell í málinum hjá KA bjargaði átta skotum. Nicholas bjargaði einum brotskasti í kvøld.
KA er nú komið uppá sætta pláss í bestu íslendsku hondbóltsdeildini við níggju stigum. Tað er sama stigatal sum ÍBV og hitt føroyingaliðið, Fram hava.
Komandi hóskvøld tekur KA móti Vali sum hevur eitt stig meira enn KA.
