Sveis byrjaði betri, men Føroyar fingu svarað aftur. Fyrsta líta korterið var støðan 4-3 og 6-5 til Sveis, áðrenn tað steðgaði upp hjá Føroyum. Frá 21. minutti og næstu seks minuttirnar fór Sveis upp á 11-5.
Føroyar høvdu eisini tvær útvísingar, og tí var ein taktiskur steðgur tikin. Síðani fingu Føroyar aftur betur spæl og trý mál, men sveisararnir vóru ídnir at svara aftur, og tá støðan tveir minuttir fyri hálvleik var 14-8, tók Sveis sín taktiska steðg.
Eftir tað kom bara eitt mál aftrat, sum Sveis fekk, so hálvleiksstøðan var 15-8. Tó høvdu Føroyar møguleikar ímóti endanum, men sveisiski málmaðurin fekk vart fyri.
Seinni hálvleikur
Eitt bakkast fekk føroyska liðið beinanvegin í seinna hálvleiki, tí tá bara tríggir minuttir vóru farnir, fekk Bárður Johannesen reyða kortið, tá hann fekk sína triðju útvísing í tveir minuttir.
Fyrstu 11 minuttirnar í seinna hálvleiki økti Sveis annars frá hálvleiksstøðuni 15-8 upp í 22-13, so hóast føroysku spælararnir fingu síni mál her og har, megnaðu teir sveisisku alla tíðina at skora meira. Og næstu átta minuttirnar fór Sveis upp á 29-17.
Millum annað fekk Sveis í seinna hálvleiki fleiri mál við fleiri skjótálopum, sum var marran í fyrra dystinum. Og tá føroyska spælið gjørdist meira og meira sløsut, samstundis sum kjansir blivu brendir, kundi tað næstan ikki enda øðrvísi.
Ímóti endanum vaks munurin bara, og tá liðugt var, hevði Sveis vunnið 35-21, sum altso er dupult so nógv sum í dystinum mikukvøldið á Hálsi.
