Nigel Worthington, landsliðsvenjari hjá Norður-Írland, sigur við SkySports, at dysturin móti Føroyum er størri enn dysturin móti Italia, sum var fríggjakvøldið.
– Fyri okkum er hesin dysturin størri, tí nú vænta øll, at vit fara at vinna. Føroyar hava ein bretskan venjara, sum kennur bretskan fótbólt. Teir hava vanliga fleiri leikarar aftan fyri bóltin, og teir fara helst at seta kílar í okkara álopsspæl, sigur Nigel Worthington vð SkySports News.
Norður-Írland hevur fingið eina góðan byjan upp á EM-undankappingina. Liðið hevur vunnu á útivølli móti Slovenia, og fríggjakvøldið spældu teir málleysan javnleik móti Italia á Winsor Park í Belfast.
– Tað er gleðiligt, at vit í teimum báðum fyrstu dystunum hava hildið nullið. Vit vístu móti Italia, at vit ræðast ikki nakran, sigur Nigel Worthington.
Um Norður-Írland vinnur dystin á Svangaskarði, so eru teir væl fyri í kappingini.
– Dysturin móti Føroyum er ein dystur, sum vit skulu vinna, um vit vilja víðari. Vit hava góðan møguleikan at koma í eina góða støðu týsdagin, sigur landsliðsvenjarin at enda.
