Fimta ár á rað skal sterkasti maðurin í Føroyum finnast.
Hetta verður tann 25. mai, tá kappingin Føroya Sterkasti enn einferð fer av bakkastokki. Eins og undanfarnu ár verður Ítróttarhøllin á Hálsi karmur um kappingina.
Í løtuni bendir alt á, at tað verða einir átta mans, sum fara at kappast um heiðurin at vera sterkasti maðurin í landinum.
Fýra tey seinastu árini hava tað fyri tað mesta verið teir somu menninir, ið hava luttikið í kappingini, men í ár verður sindur annarleiðis.
- Fleiri av luttakarunum hesaferð hava verið darvaðir av skaðum, og nakrir teirra í so stóran mun, at teir ikki kunnu vera við leygardagin 25. mai, sigur Bogi Hammer, ið er fyriskipari, og sum eisini sjálvur ætlar sær at luttaka í kappingini.
- Um kappingin í ár skuldi blíva til nakað, var eg noyddur at so at siga headhunta luttakarar til kappingina, av tí at fleiri frámeldingar hava verið orsakað av skaðum. Nógvir menn eru kring landið, sum fáast við styrkilyfting, og teir, eg havi bjóðað við til kappingina, hava verið til dystin fús. Eg kann longu nú lova, at kappingin aftur í ár verður spennandi, sigur Bogi Hammer.
Kappingin Føroya Sterkasti verður leygardagin 25. mai og byrjar klokkan 15.00
