Tað er tíðliga at staðfesta, at Neistin verður annað av liðunum, sum skal spæla finalurnar um føroyameistaraheitið. Men fyrstu umførini hava givið greiðar ábendingar um, at verandi føroyameistarin fær møguleikan at endurvinna gullmerkini, tá kappingarárið fer at halla av álvara.
Neistin er greitt oddalið. Fyrstu sjey dystirnir hava givið fult stigatal, 14 stig, og tað er fýra stig meira enn VB, sum er nummar tvey.
Stjørnan spældi í ítróttarhøllini á Hálsi í gjár. Neistin vann uppiborið við fýra málum, 29-25, og hevur beina kós í finalurnar.
Sleptu í seinna hálvleiki
Neistin buldraði avstað beinanvegin í gjár. Heimaliðið var eina løtu á odda við heili níggju málum, men klaksvíkskvinnur, sum hevði til uppgávu at avmarka tapið sum frægast, góvu ikki skarvin yvir.
Oddaliðið var á sigurskós allatíðina, og hóast neistakvinnur tóktist taka sær av løttum eina løtu eftir steðgin, so hevði Neistin tamarhald á støðuni, og sigurin var heldur ongantíð í vanda.
