Tvey av fremstu liðunum á stigatalvuni í Vodafonedeildini, NSÍ og EB/Streymur, møtast við Løkin í Runavík, har stórt trýst man liggja á báðum pørtum. NSÍ hevur ikki verið í finaluni síðani 2004, meðan EB/Streymur hinvegin hevur verið fastur táttur í síðstu fýra finalunum. Hetta kann gerast ein javnur og spennandi dystur, har hvørki liðið vil boyggja seg.
Dysturin í Sarpugerði í Norðragøtu er ein rein eysturoyaruppgerð, tá Víkingur tekur ímóti B68. Her kann eisini alt henda, tí meðan Víkingur snávaði á heimavølli ímóti 07 Vestur um vikuskiftið, fekk B68 fyrstu ferð fult í sínum dysti á Sandi. Eisini her kann roknast við einum dysti, har bæði vilja gera sítt ítarsta fyri at vinna.
Í Sørvági verður talan óivað eisini um ein opnan dyst millum tveir uppflytarar, tí har hittast 07 Vestur og KÍ. Serliga KÍ hevur havt vind í seglunum og telist millum fremstu liðini, meðan 07 Vestur kanska ikki hevur fingið øll tey stigini, liðið kundi havt uppiborið í fyrstu dystunum. KÍ er kanska lítil favorittur undan dystinum, men fær einki ókeypis frá vágamonnum.
Á pappírinum hevur ÍF lættastu uppgávuna, tí liðið á heimavølli tekur ímóti AB, sum flutti niður í fjør og ikki hevur staðið seg betur enn næstbest í 1. deild hjá monnum higartil í ár. Tað sigur kanska sítt, at ÍF fríggjakvøldið vann greitt á HB, samstundis sum AB leygardagin tapti fyri næstbestu manningini hjá HB. Her er ÍF stórfavorittur.
