Við flogfarinum til Íslands fyrrapartin var A-landsliðið í fótbólti, sum seinnapartin sunnudagin skal spæla ímóti Íslandi í Kórinn-høllini á Kópavogi. Stundir og høvi hava ikki verið at samlað menninar undan fráferðini, men tvær venjingar verða yviri í Íslandi áðrenn dystin, ein í kvøld og ein í morgin.
– Vit ætla okkum at leggja stóran dent á at vera vælskipaðir á vøllinum. Og tá vit fara í álop, skulu vit helst hava fýra mans við fram hvørja ferð, og eg vil fegin hava, at síðurnar koma væl við, umframt at miðvøllurin skal stuðla álopinum, sigur Heðin Askham, sum saman við Jens Martin Knudsen hevur ábyrgdina av landsliðnum henda eina dystin.
Talan er um ein hin yngsta og minst roynda A-landshópin, Føroyar nakrantíð hava havt til ein dyst, og tað hevur Heðin eisini fingið at hoyrt fyri. Hann hevur tó ikki tikið sær hetta nær, men fer fúsur og bjartskygdur í gongd við uppgávuna.
– Eg havi ikki havt svøvnleysar nætur eftir úttøkuna, tí hetta er vegurin, vit eiga at ganga. Um tað so skal gerast upp á henda mátan ella ikki, má tíðin sleppa at vísa. Onkur hevur eisini sagt tað soleiðis, at talent vinnur dystir, men rutina vinnur kappingar, sigur Heðin Askham.
Eisini ungt lið
Eisini íslendski starvsbróður hansara, Ólafur Jóhannesson, hevur tikið út eina unga manning til dystin sunnudagin, tí av teimum 16 úttiknu eru fimm spælarar, sum eiga fyrsta landsdystin til góðar, og fýra hava bara spælt ein. Aron Einar Gunnarsson, sum spælir við AZ Alkmaar í Hollandi, er einasti útisetin á íslendska liðnum.
Tá Ísland og Føroyar spældu vinardyst fyri einum ári síðani, sum var fyrsti innandura fótbóltslandsdystur har yviri, vann Ísland framman fyri 747 áskoðarum 3-0, eftir at hava verið á odda 2-0 í hálvleikinum.
Dysturin sunnudagin byrjar klokkan 14.00, og umvegis íslendska ríkissjónvarpið RÚV verður hann vístur í sjónvarpinum hjá Kringvarpinum.
